政情：陳健波自掏腰包請翻譯
泛民議員經常要求取消所有功能組別，又話功能組別已經完成歷史使命，唔應該再予以保留，但其實功能組別議員中，又唔係個個都係大懶蟲。好似保險界陳健波咁，直至現時都係功能組別中出席率最高嘅議員，出席率差唔多百分之百。除咗開會勤力外，原來佢都好照顧保險界選民，每年自掏腰包幾萬蚊搵人翻譯立法會文件，等班老外知道立法會發生乜事。
將立會文件譯成英文
話說唔少保險公司老闆都係唔識中文嘅外籍人士，波哥就話一直收到唔少外籍選民投訴，話佢哋唔清楚立法會到底拗緊乜，所以波哥近排就外聘專人翻譯立法會文件，但費用就係每翻譯成一個英文字就要兩蚊，一年閒閒哋都要用四、五萬蚊。
其實立法會本身都有翻譯服務，每次開完會後，立法會都會有中英文嘅逐字紀錄，但波哥話最少要等幾個禮拜，所以寧願自己畀錢，都唔想班選民等。不過由於翻譯嘅文件數量實在太多，波哥最近仲請咗個港大畢業生專門負責翻譯。波哥咁認真，除咗佢嘅老外選民可以盡快知道立法會做緊乜，仲製造埋就業機會添。