政情：陳家強被指不負責任
尋日財經事務委員會會議，多名委員議員質疑政府倉卒成立金融發展局，有意繞過立法會。不過財經事務及庫務局局長陳家強就話，金發局主席史美倫已提出樂意同立法會「溝通」，而局方亦樂意向立法會「報告」，不過有啲細節就要等史美倫下星期一親自去委員會解釋，結果畀委員話佢不負責任。
回答無實質內容
會計界梁繼昌話其實籌備工作小組報告中只有一個國家用擔保公司成立，質疑政府堅持用擔保公司成立金發局嘅理由。不過陳家強話，用擔保公司成立只係小組報告嘅建議，但佢唔係成員，唔可以代答，不過按佢理解安排只為增加金發局彈性，結果被公民黨郭家麒批評佢不負責任，事事細節都要問史美倫。
史美倫喺金發局首次開會後強調，金發局嘅擔保有限公司仲未成立，局方會再聽各方意見，不過民主黨涂謹申就話，局方尋日喺文件寫明，金發局「將會」以公司成立，究竟局方係咪已決定用公司成立？陳家強再答咗一輪，但無實質內容。睇嚟都係要等史美倫下星期一去委員會解畫，議員都係暫時慳番啖氣啦。