政情：貧窮線點訂雞同鴨講

扶貧委員會社會保障和退休保障專責小組尋日第一次開會，討論點樣訂立呢條貧窮線，個會開咗三個鐘頭。小組成員之一嘅新民黨田北辰（田二少）就話外國多數將條貧窮線訂為家庭入息中位數嘅一半，民協馮檢基（KK）就話要訂喺六成，十足街市買餸討價還價咁。當田二少講到其他國家多數將條線都係訂喺家庭入息中位數五成，但KK就話貧窮線應該有三條，一條係政府要為喺呢條線下嘅人嘅生活「包底」嘅「絕對貧窮線」，另外兩條就係訂喺家庭入息中位數六成嘅貧窮線，同埋以家庭入息中位數七成計嘅「防貧線」。

計唔計資產都拗好耐

除咗條貧窮線訂喺邊大家都要「寸土必爭」之外，訂貧窮線時係唔係將資產計算在內，大家都討論咗好耐。田二少就話，唔少街坊都假設只要收入喺貧窮線下政府就會幫，而佢個人就希望有資產審查，否則政府會變咗係又幫、唔係又幫，到時盞好心做壞事，除非政府講到明條貧窮線只係協助制訂扶貧政策，並唔係同申領社會福利嘅資格掛鈎咁話。

生果金當入息富爭議

一講到入息資產審查，又係個傷腦筋嘅問題，淨係計唔計埋政府福利轉移都已經可以拗餐飽。而田二少同KK都同意，一啲全香港人都可以享有嘅福利，例如十二年免費教育、公營醫療服務等係唔計入去嘅，但係一啲針對性發放嘅社會福利，好似住公屋咁，就要計埋落去喇。

跟住大家又會諗，咁生果金又計唔計入入息呢﹖聽聞呢樣嘢有好大爭議。KK就話，生果金係政府因為尊敬老人家而發放、同扶貧無關嘅，所以唔應該計入入息資產審查嘅。但據了解會上有部分人又唔係咁睇囉。睇嚟呢樣嘢分分鐘又會掀起社會上一番唇槍舌劍。

所以話特首梁振英勇於討論過往政府唔敢掂嘅問題，睇吓淨係訂立貧窮線都有咁大爭議，有排拗。