中環出更：黃家和北上開會凍到震
餐飲聯業協會會長黃家和（Simon）榮升黑龍江省政協，日前以新丁身份，北上哈爾濱開會。當日冰天雪地，氣溫僅得零下三十二度，Simon出動羊毛保暖褲、鵝毛大衣，依然凍到「騰騰震」。參觀冰雕時，想話除低手套自拍一番，唔使兩分鐘，已凍到手指痛。
哈爾濱漫天風雪
受西伯利亞冷風影響，哈爾濱今年特別凍。Simon一於頂硬上，出發前摷定一對購自美國，能抵擋超強寒流嘅保暖手套，加埋一件特厚鵝毛大褸、超厚頸巾等，勇闖哈爾濱。雖然當地室內有暖氣，着西裝、恤衫開會無問題，但一行出室外，就係漫天風雪，Simon驚覺開會嘅會議中心已被厚厚積雪蓋住，蔚為奇觀，即時用手機拍低佢。
開會之餘，佢趁機參觀當地著名嘅奇幻冰雕，又品嘗地道美食，但選擇以小麥麵食為主，款式唔及香港多，最後畀佢發現下榻酒店有間「阿一鮑魚」，特別親切。Simon話，哈爾濱人消費力強，稍後會考慮引入更多港式餐飲，等當地人有啖好食。