中環出更：華麗之夜美容界好博愛
專為人扮靚嘅美容界，早前合作舉行一場精彩嘅《華麗舞台博愛慈善之夜》，首次為博愛醫院籌款。美髮美容業商會創會會長兼「假髮大王」趙振國（CK）、國際導師評審協會會長兼籌委會主席陳慶桓（Mandy）、香港美容業總會創會主席葉世雄（Nelson）等業界人士齊現身。Nelson經常公開為美容界發聲，佢嘅長髮形象深入民心，原來係無心插柳，事關佢怕煩，所以一年只剪兩次就算。世界髮型設計家協會（中國）會長彭錦釗笑稱，如果大家都學佢，業界就好難搵食喇！
一向識得享受人生嘅CK，最近瞓身推動養生，冇咩應酬就匿埋喺深圳別墅練氣功及瑜伽。佢話本月底將到泰國清邁放半個月長假，過埋農曆新年至返港。
趙振國近年專蒲亞洲
今次佢特登喺山上租咗一棟獨立度假屋（Villa），過吓與世隔絕嘅生活，同時趁機寫書，推動大家對身心靈修煉方面嘅興趣。
原來CK經常咁樣享受超豪假期，試過去布吉、蘇梅島等地租住成棟度假屋，期間除咗有專人服侍衣食住行之外，仲可以帶廚師去買食材，返去炮製度身訂造嘅美食。佢以前鍾意全世界周圍去，近年就鍾意就近喺亞洲玩。咁豪華嘅旅遊行程花費幾多？CK笑笑口話，唔好講錢喇！
當晚博愛醫院主席潘德明、候任主席曾耀祥等人都有到場。原來籌辦晚會嘅Mandy係潘德明老友，因此促成今次美事。當晚節目包括華麗宮廷髮型表演、人體彩繪及化妝比賽，美不勝收。
卓妮