施政報告宣布額外預留二十億元畀十八區區議會推展「社區重點項目」，點知民主黨（白鴿黨）黃碧雲（一舊雲）上星期就喺立法會民政事務委員會上話擔心撥款會被民建聯（民記）主導，變成民記喺區議會選舉嘅政治籌碼。雖然一舊雲嘅言論被人批評佢眼紅建制派、信唔過啲民選區議員，但佢尋日又開記者會要求政府改善計劃撥款程序，否則會就撥款玩拉布。
一舊雲話，區議會就「社區重點項目」成立獨立評審委員會，入面冇乜泛民主派成員，建議要搵多啲獨立或專業人士加入委員會，費事出現利益輸送。該黨南區區議員柴文瀚就批評，政府要求各區議會喺三月底前提交第一輪構思計劃大綱係急就章，要求政府延長區議會諮詢期。其實施政報告都提出成立十幾個委員會聆聽民間意見，但就畀泛民批評拖延解決社會問題，點解白鴿黨依家又嫌區議會要喺三月底交計劃大綱係急就章呢？
一舊雲最後又話，倘當局續漠視民意，畀區議會做埋晒啲大白象項目，立法會議員可能會喺財務委員會審批地區工程撥款時提出大量質疑，輪流玩拉布。「社區重點項目」推出至今不斷被抽水質疑，相信當局之前真係諗都未諗過。