新當選港區全國人大代表陳勇一直予人感覺文質彬彬，但佢喺九九年葵青區議會選舉已披甲上陣大戰街工梁耀忠，佢話當年初次參選好多嘢都唔識，基本上對方做乜就跟住做乜，笑言認咗阿忠係半個師傅。阿忠回應時堅稱冇教佢任何嘢，但認為對方有偷師都唔出奇。

陳勇最為人熟悉嘅係佢新界社團聯會理事長嘅銜頭，佢自爆當年落葵芳邨挑戰阿忠時，基本上係對手做乜佢就跟住做雙倍，記得有次街坊報料話阿忠搞地區旅行團，陳勇直情報名參加滲透敵方陣地偷師，佢依家諗番都覺得當時有啲瘋狂，最後佢取得近一千八百票，以一千多票之差輸咗畀阿忠。

翻查資料顯示，近四屆區會選舉，挑戰者當中只有陳勇當年取得近一千八百票，另外三屆阿忠都大比數拋離對手勝出。阿忠回應時都話對陳勇有印象，幾乎每日都用大聲公同當區選民講解工作，甚至成為民建聯當年做地區嘅工作模式。唔知事隔十多年後，陳勇仲有無機會同阿忠再喺選戰中一較高下呢？