流感殺埋身，大家要小心！
嗱，各位真係要小心保重身體呀，公立醫院亂象叢生，醫極都醫唔好，萬一流感大爆發，第一個躀低嘅隨時就係公營醫療系統。你話嘞，大家如果想平平安安過新年，係咪要保持身體健康，免得過都唔好入醫院吖？
咁啦，聽吓當局點講啦。食物及衞生局局長高永文發預警，話近期流感病例有上升趨勢，已高於基線並接近警戒線，加上廣東、珠海等鄰近地區個案亦有所上升，反映本港未來幾個星期將進入季節性流感高峰期，呼籲長者及小童等高風險人士接種流感疫苗。佢仲話，食野味有死灰復燃迹象，呼籲市民忍忍口，盡量避免接觸野生禽鳥，以防感染變種流感喎。
又季節性流感，又變種流感，唔到當局懶懶閒，除咗發預警，仲聯同多個部門進行代號「琥珀」嘅應變演習，出動百幾人參與，模擬為護老院展開實地檢疫行動，係威係勢咁。
講到呢度，大家有乜感覺呢？功夫茶就愈諗愈驚嘞，聽官老爺講到形勢咁緊張，即係疫情已兵臨城下，殺到埋身啦，但係點解公院大敵當前仲係亂象叢生呀？公院係防疫最前線，如果防線失守，潰不成軍，又點樣打好呢場仗呀？
其他唔講，就講急症室嘅亂象，就足以嚇死人。一名八旬老翁前晚腸胃不適，去沙田威爾斯親王醫院求診，點知去到一睇，當堂嚇到斷腸，成個大堂逼滿人，有人等到鼓譟，有人等到呆咗，有人頂唔順要打橫瞓喺長椅，簡直七國咁亂。結果，老翁被列為次緊急病人，一等就等咗十三粒鐘！
呆等十三粒鐘，唔病死都痛死啦。試諗吓，太平日子無事無幹，急症室都亂晒大龍，遲啲流感大爆發，急症室仲唔淪陷？咁點樣抗疫呀？見到呢一幕，市民諗起嘅唔係食野味，而係想問候港產官僚，你哋瞓醒未呀！
公院亂象醫極都唔好，面對流感危機，的確需要嚟一次實地演習，不過代號唔係叫「琥珀」，而係「苦怕」，病人苦苦等到怕。模擬場景更加唔應該係護老院，而係急症室，搵百幾二百個病人好似沙甸魚咁逼爆，然後幾個人扮醫護人員裙拉褲甩走嚟走去，一個為病人打錯針，一個為病人輸錯血，一個為病人斷錯症，另外一個壓力爆煲頂唔順，最後喺病人堆中躀低咗……官老爺，咪以為係演習呀，一旦流感大爆發，噩夢隨時成真！
公院亂象久未治，一爆疫症大件事。各位港產官僚，快快將醫療亂象醫番好，如果你哋教而不善，市民惟有向你哋開刀！