任職「天文台」成了「新興行業」，近期小販集團還在報章公然刊登招聘廣告。但「天文台」絕非「企喺度」便有錢賺的優差，初次任「天文台」的阿偉訴說當中辛酸，包括整天站在同一位置，不能擅自離開，人有「三急」亦要「死忍」，還要飽受「檔主」「車輪戰」的「辣更」，對於這份非法的苦差，他以身心俱疲來形容。
「初初以為咩都唔使做，淨係企就有錢，都幾好，但係原來唔係嗰回事。」在港鐵站內「呆企」九小時的阿偉一邊按摩小腿，一邊向記者訴苦。他坦言，成世人第一次被「罰企」九小時，不只肌肉痠痛，連人有三急均要「緊守崗位」，「Cherry話只係可以趁食環嚟掃，走緊鬼嗰時，先可以去（廁所），結果食環嚟咗一次就冇嚟，我就成日都冇得去。」
除要承受生理上的煎熬，精神上阿偉亦飽受折磨，「嗰九個鐘好似畀人監視住咁，連睇個WhatsApp都驚『檔主』辣更時睇到，搞到連電話都唔敢聽，成日淨係棟喺度，真係好難頂。」
阿偉指，Cherry與另三名「檔主」會不定時到各「天文台」駐守處巡視，又常以對講機要求「天文台」報告情況，以防有人「蛇王」，「有個同我一齊做『天文台』嘅女仔拎咗部電話出嚟睇咗一陣，咁啱有個『檔主』行過見到，結果被人鬧到死死下。」
執業大律師陸偉雄指，無牌小販固然違法，惟只負責「睇水」的「天文台」亦同樣干犯協助教唆他人無牌擺賣之罪行，故阿偉坦言：「我都知衰，以後唔會再做。」