政情：焗落中環捱貴租 陳浩濂貼錢做區議員
好多區議員新丁，選完先發覺係噩夢來臨，好似中西區山頂區議員陳浩濂（Joseph）咁，原來每個月要貼錢做區議員。原來佢喺山頂搵咗成年都搵唔到合適舖位做議員辦事處，惟有落戶中環商廈，淨係租金加職員人工已經成五萬蚊一個月，扣除區議員人工同實報實銷津貼，最少要貼多幾千元。
山頂商舖只准賣嘢
區議員人工少都講咗好耐，撞正選區位處黃金地段，要租個幾百呎辦事處都唔係咁易，好彩Joseph本身喺渣打銀行投資部做董事總經理，月入十幾萬，先可以補貼區會工作。佢話山頂區嘅物業契約零舍特別，全部商舖只准賣嘢，唔准做辦公室，惟有去中環捱貴租開檔。
最後Joseph喺砵甸乍街一棟商廈租咗個細單位做辦事處，租金已經要萬幾蚊，加上喺中環請職員，出手太低根本冇人肯做，所以辦事處兩位職員月薪都過萬蚊，加埋其他辦事處開支，已經要五萬蚊，難怪佢要倒貼啦。原來做山頂區議員，皮費都重啲，其他黨派要落去搶位都唔係咁容易。