政情：哪吒大鬧區會畀人「遺憾」
全港十八區民政事務處分別各有一名民政事務專員（簡稱DO），負責協調區內大小事務，向來工作低調，但西貢民政事務專員蕭慕蓮最近就頂唔順大爆發，罕有咁高調向西貢區議員「哪吒」方國珊開戰。蕭慕蓮發信畀西貢區議會主席，以強硬字眼遺憾「哪吒」違規周街亂掛宣傳橫額，以及安排支持者同助理大鬧區議會。不過，哪吒反駁話係DO唔肯聽民意，唔妥佢喺高官面前示威，有心向佢政治打壓。
聽聞哪吒作風向來獨來獨往，有時喺西貢區內周圍掛橫額同直幡，早已引起其他建制派不滿。話說有次環境局副局長陸恭蕙到西貢視察堆填區，但哪吒率先上前抗議擴建堆填區，大部分建制派不滿佢玩寸個Party，然後經常向DO投訴。不過，觸發DO開戰都唔係呢啲理由，而係哪吒喺本月八日區議會大會上嘅一舉一動。
DO喺封遺憾信中力數哪吒，話當日會議本來討論緊哪吒嘅違規行為，但哪吒竟然安排助理同支持者喺公眾席「大吵大鬧」，點知哪吒冇接受勸告不特止，仲親自以「恐嚇性的態度粗暴潑罵職員」，DO仲形容哪吒聲浪「傳遍整個區議會會議室」，咁嘅形容一係哪吒當時真係好激動，否則可能係DO誇張失實。
哪吒還擊：選擇性針對
不過，可以相信嘅係DO寫呢封信時應該愈寫愈嬲，因為連鬧人都用錯字，例如佢話哪吒用「粗卑言詞」，但其實應該係「粗鄙言詞」至啱。DO最後話哪吒一而再漠視法紀、無理取鬧，所以先發信遺憾佢行為。
咁哪吒又有咩解釋呢？哪吒先澄清話公眾席人士只係將軍澳居民，冇一個係佢嘅助理，但係咪支持佢就好難界定。
哪吒又話，其實成件事係西貢區議會設計先天性有缺陷所致，竟然用大大塊玻璃隔住公眾席同會議廳，佢慨嘆立法會都唔敢咁做，但西貢區議會反而行倒車，令公眾聲音傳遞唔到入區議會，市民實嬲爆爆喎。
至於係咪周街亂掛宣傳橫額，佢就話好多西貢區議員都係咁做，就算佢違規都已經交晒罰款，唔明DO點解要選擇性針對佢，總之一句講晒，欲加之罪，何患無辭喎。