有錢嘅人鍾意掌握權力，所以公職位置對某啲政治人物來說，係兵家必爭之地，好似自由黨嘅人做咗旅發局主席多年，換屆在即，之前傳出經濟動力林健鋒有意爭奪主席寶座。據聞自由黨都預期可能會失去旅發局呢個橋頭堡，所以最近已經將目標轉移到貿易發展局，事關貿發局主席蘇澤光已做夠六年任期，係時候換人，但該黨嘅如意算盤係咪打得響，仲有待事態發展成點。
旅發局掌管全港嘅旅遊界同酒店界命脈，而貿發局更係本地展覽業嘅揸莊人，喺商界嘅影響力一啲都唔細。我哋聽聞自由黨知道無望再把持旅發局主席之位，而該黨亦難以世襲呢個位後，已經諗緊轉戰其他類似公職，以保持人氣，亦多個平台拉攏商界人脈，所以貿發局主席個位成為該黨嘅不二之選。
不過，貿發局主席呢個位，戰略性位置較旅發局高好多，所以有冇商界中人想落場爭奪，相信未揭盅前都好難預料。至於旅發局主席究竟係邊個做呢？我哋聽聞方剛唔係咁想做，但亦未必輪到林健鋒做，據聞呢個人選無厘頭到連大家都未必估到，話唔定公布結果時，大家跌碎晒眼鏡都未定。