英國文化協會早前喺金鐘港鐵站「插半旗」做廣告宣傳，整層月台柱位被半支米字旗滲透，仲寫上「THIS IS GREAT BRITAIN」，唔知以為英國喺度宣示主權，但點知日前該會已經「下半旗」撤回廣告。
英國文化協會發言人解釋，由於宣傳字眼引起「錯誤解讀」，為免分散宣傳活動，於是就決定拆除宣傳。發言人又話，英國教育節係一項環球活動，而佢哋呢個「THIS IS GREAT BRITAIN」嘅宣傳訊息亦係環球通用，但考慮到香港情況，所以先作出呢個決定。
