政情：專責特別需要社群 李家傑獲邀助扶貧
特首梁振英視扶貧工作為新政府重點工作之一，早前已重設扶貧委員會並邀請各界社會人士加入，近日又為轄下多個小組委任增補委員，其中令人眼前一亮嘅增補委員，就係人稱「四叔」恒基地產主席李兆基嘅長子李家傑，佢獲邀加入做扶貧委員會轄下「特別需要社群專責小組」增補委員之一。
主動要求想加入
李家傑近年致力參與社會事務，冇幾耐之前透過恒基溫暖工程基金，分別喺天水圍、深水埗同筲箕灣開設咗三間以平價見稱嘅「家園便利店」，點知話咁快就獲垂青加入「特別需要社群專責小組」成為增補委員，相信事前都冇乜人會估到。不過，其實佢於去年底曾表示會主動聯絡政府，提出想加入扶貧委員會，唔知係咪用誠意打動到政府呢？
至於由政務司司長林鄭月娥親自出任主席嘅「社會保障和退休保障專責小組」，據聞會研究退休保障嘅問題，因此各方人士都嚴陣以待，除咗有最多嘅十四名扶貧委員會委員加入，另外五名增補委員中有至少三人係學術界代表，包括安老事務委員會主席陳章明、香港大學經濟學教授王于漸等，相信到時將會掀起一番激烈嘅討論。