政情：Greg蘇兇廣播業界
政府就本地免費電視台發牌風波已經擾攘多時，立法會資訊科技及廣播事務委員會今日就會討論呢個問題，邀請商務及經濟發展局局長蘇錦樑（Greg蘇）出席，交代當局處理有關牌照申請嘅進度，並邀請相關業界出席發表意見。不過，Greg蘇日前突然去信委員會，表明有機構正就發牌一事提出司法覆核，所以業界喺會議上發表嘅意見，當局會保留喺日後司法程序上提出爭議嘅權利，莫非佢想曲線叫啲業界咪亂講嘢？
資訊科技及廣播事務委員會今日邀請咗廣播業界多間公司代表出席，當中包括電視廣播有限公司（無綫）、亞洲電視以及有份申請牌照嘅香港電視主席王維基（魔童）等，淨係睇呢三方代表嘅陣勢，相信會議好大機會擦出火花。不過，就喺開會前幾日，Greg蘇突然去信委員會表明立場，首先閂定後門話自己必須遵守行政會議嘅保密原則，即係話如果涉及發牌嘅機密資料就唔會透露。
出席代表勢難暢所欲言
Greg蘇又喺信中提醒，有機構正就發牌申請事宜提出司法覆核，任何關於當局現時處理該司法覆核申請嘅細節事宜，佢都唔會評論。唔單止咁，佢仲提醒出席者「在這次會議所作的任何關於該司法覆核案件的意見或評論，我們將不予回應，並保留在日後的司法程序中就該等意見或評論提出爭議的權利」，換句話大家嘅意見將作為日後司法覆核嘅呈堂證供。
Greg蘇呢封信，猶如去信「兇」人哋冇分別，試問出席嘅廣播業界代表，仲邊能夠暢所欲言呢？定係每間機構代表都要帶多位律師出席會議呢？不過，呢班業界代表最後係咪夠膽出聲表達不滿就唔知，但委員會主席黃毓民收到Greg蘇呢封信，就肯定要做番啲嘢，就係要喺開會前或開會時提醒出席嘅代表，必須注意當局嘅「提醒」，否則將來發生乜嘢事，就閣下自理喇。