中環出更：陳國民父女多「煮」意
中華廠商聯合會常務會董兼「家電大佬」陳國民（Edward），因為愛下廚，三十年嚟瞓身研究生產各式電器，成功打造億元家電王國。最近佢一口氣買下土瓜灣總部隔籬八個工廈單位，打算將烹飪中心面積擴充一倍至四千呎，仲做埋私房菜添，目的係方便佢同城中好友一邊玩煮飯仔一邊把酒言歡，人生一樂也。
Edward最叻煮嘢食，經常喺烹飪中心炮製美食。早前佢同身兼工業總會青委副主席嘅囡囡陳嘉賢（Karen），齊齊下廚炮製生炒糯米飯及琵琶雞，仲有潮州人至愛嘅反沙芋、花生糖等甜品。只見佢哋嘅輕鬆又合拍，依序將切好嘅材料放入自動炒菜機，唔使郁手炒，十二分鐘就完成香噴噴嘅糯米飯。
陳嘉賢拿手整刁鑽菜式
原來炮製琵琶雞仲簡單，將搽上醃料、風乾一晚嘅雞放入光波爐，不消廿分鐘就變出皮脆肉腍嘅琵琶雞，賣相都唔錯。卓妮試過佢哋嘅手勢，確係色香味俱全，仲趁機偷吓師添！不過，咪以為佢哋餐餐都要食好嘢，原來Edward只得自己一個人嘅時候，食一碗雲吞麵已經搞掂，佢仲話希望推廣健康生活態度，深化食得健康嘅理念。
已育有一子嘅Karen，喺外國讀書居住咗十二年，所以點都學識煮飯嘅，就算佢想食鮮磨核桃露、葡撻或刁鑽菜式，都絕對難唔到佢，但返港後礙於工作忙碌，家傭自然成為家中嘅「伙頭大將軍」。
卓妮