工友飯碗勿作賤 輸入外勞莫輕言

示威之都又有人示威,今次嘅示威者係職工盟同工聯會。示威嘅訴求係乜嘢呢?哦,就咁,職工盟建築地盤工會成員由金鐘海富中心遊行到政府總部,反對特首梁振英較早前講過,不排除考慮輸入建築工人外勞。

本地紮鐵工人擔心,政府一旦輸入外勞會令佢哋薪酬下降甚至飯碗不保,又認為紮鐵有淡季同旺季之分,政府應該規劃好各工程嘅建築時間,有效規劃人手。示威者又提到,建造業失業率百分之四點四,高過整體失業率,根本毋須輸入外勞。至於工聯會嘅示威者,質疑施政報告提出取消外傭稅係為輸入外勞鋪路。工聯會立法會議員郭偉強認為,政府唔應該輕言輸入外勞,反而應該保障本地工人就業機會,加強培訓同埋改善工人待遇,吸引更多人加入勞動市場。

講到呢度,功夫茶有必要同大家回一回帶,睇下政府高官曾經點樣發表治港偉論。發展局局長陳茂波講過,行內失業率仍然有百分之四點四,就業不足率達到百分之七,明確表示唔贊成輸入外勞。政務司司長林鄭月娥亦都講過,香港不會輕言輸入外勞,為咗滿足基建發展,策略都係透過本地培訓、再培訓同吸引年輕人加入建築行列。

既然司長同局長對輸入外勞耍手擰頭,因乜事幹梁振英嘅立場忽然大異其趣嘅呢?表面上嘅原因係咁嘅,CY話房屋政策係重中之重吖嘛,未來幾年要打造更多住宅單位,大興土木當然需要大量工友,為輸入外勞「開黃燈」係未雨綢繆。之但係咯喎,實際上有另一個陰謀論。

根據政圈中人嘅密碼解讀,梁振英已經靜雞雞同工商界妥協,畢竟工商界永遠覺得員工薪金太高,若然可以輸入廉價外勞,自然可以將薪金拉低。基於呢一個陰謀論,所以CY同林鄭以及波叔嘅嘴形非常之咁唔夾。當然啦,特首有佢自己嘅一套講法,佢話喎,建造業人手不足係客觀存在嘅事實,影響到基建工程延誤並且令建築成本上漲。香港嘅專業級別建造人員可從外面輸入專才,所以人力供應充裕,但前線人員不足,大方向係要先滿足本地人嘅就業需要,但當本地勞動力不能夠支援發展需要之時,必須考慮從外地輸入勞工。

其實計功夫茶話齋,輸入外勞絕對係一個敏感到極嘅話題,稍有政治智慧嘅官場中人都唔會亂噏廿四。喂,建造業工友嘅飯碗真係唔可以隨便作賤o架,萬一外地勞工搶爛市,觸發更加怒氣沖沖嘅遊行示威點算呀?除非工友失業率跌到接近零,否則為咗討好工商界而得罪勞工界,代價可能好大o架!