政情:八網難逃:沈祖堯身體力行教環保

近年間間大學都話要搞環保,教學生認識可持續發展。中文大學亦唔例外,中大校長沈祖堯尋日上載網誌話,環保同可持續發展唔可以只流於理論,佢作為校長要身體力行,親自參與兩個有關廚餘嘅校園環保計劃,用唔要嘅生果整成果醬,搽喺聖誕派對剩低嘅麵包嚟食,人哋唔要嘅蔬菜,就用嚟整素食菜式,唔單止好食,仲好健康咁話。

想喺校園種有機菜

沈祖堯尋日喺網誌話,中大校園大部分坐落喺山上,天氣清涼嘅時節,不妨熄冷氣,打開窗。周末時就熄咗唔用嘅燈同升降機。校園內仲可以裝多啲飲水機,等同學自己帶水壺,買少啲樽裝水。更加有創意嘅係喺校園度種有機菜,將廚餘化做肥料。

知易行難。沈校長都明呢個道理,所以佢話唔係要求同學完全改變生活方式,但係希望同學反思吓,喺方便、效率、滿足同可持續性之間搵平衡點。

第一手消息請下載on.cc東方互動iPhone/iPad/Android/Windows Phone Apps