政情:瓜田李下 曾俊華李澤楷飯聚

近日忙於撰寫財政預算案嘅財政司司長曾俊華(鬍鬚曾),照計應該忙到一頭煙,佢早排仲自爆話返到屋企仲要加班。但點知鬍鬚曾前日就被人發現佢同電訊盈科主席李澤楷(小小超)食飯,奇就奇在小小超旗下嘅兩間傳媒機構都對特區政府唔多友善,但係佢哋食飯食得咁開心,係乜嘢邏輯相信外人都好難明白。

不談政治 只是敍舊

鬍鬚曾畀人撞見同小小超喺鯉魚門歎海鮮、飲紅酒,同場仲有前環境運輸及工務局局長廖秀冬等人,小小超就話飯局無講政治議題,只係食吓飯敍舊。鬍鬚曾位居特區政府第三把交椅,小小超則擁有一間報紙同一個電視台,但又不時同政府抬槓,兩人見面,唔通預算案要特別諮詢小小超嘅意見,還是小小超有建議要同鬍鬚曾當面提出?定係仲有其他嘢傾?有時真係表面睇到嘅同內裏係完全兩回事嚟o架。

既然世事好多時表裏不一,人同人嘅關係又好難睇得透,前朝曾經係貪曾愛將嘅鬍鬚曾嘅預算案為咗博掌聲,會唔會再亂派錢都好難講嘅,大家惟有拭目以待喇。鬍鬚曾下月廿六日會為第四屆特區政府宣讀第一份預算案。

第一手消息請下載on.cc東方互動iPhone/iPad/Android/Windows Phone Apps