中環出更:林建康提早三年 為囝囝搵學校

愛沙尼亞駐港名譽領事林建康(Matthew)尋日同太太黃寧艷拍拖入馬場,佢哋有份嘅團體馬「精彩日子」跑出,開心到極。Matthew打算農曆新年同十一歲嘅囝囝去英國搵間學校。諗住幾時去讀書?Matthew話其實係三年後,不過預早去考察吓,可以及早掌握當地嘅入學資訊喎。原來佢同太太年輕時都係喺英國讀書o架。

尋日沙田馬場舉行三場盃賽,其中以董事盃嘅戰況最為激烈,結果「精彩日子」以大熱姿態奪冠,帶挈眾馬主瓜分四百五十六萬元獎金,認真和味。「精彩日子」係團體馬,鄉議局主席劉皇發公子劉業強同太太葉愛愛都有份齊捧杯。

林太尋日以一身豹紋打扮現身,卓妮發現佢雙手特別搶眼,講緊嘅除咗佢手上嘅巨型鑽石戒指之外,仲有可愛嘅米奇老鼠卡通指甲,靚得嚟原來好實用。林太自爆,美甲係為咗四歲嘅囝囝而設,可以吸引佢嘅注意力,又可趁機教佢認識卡通人物,增添親子樂趣喎。

新當選人大代表嘅國際小母牛香港籌募委員會副主席王庭聰,尋日亦親身到馬場,替佢有份嘅新馬「好爽趣」打氣,可惜該駒首次出賽尚欠經驗三甲不入。

王庭聰夾何家勁搞生意

王庭聰笑言,新馬落地係要交吓學費嘅!佢話當選人大後,最關心嘅問題係香港及內地嘅食物安全同價格,而佢有見市民愈來愈注重健康飲食,最近與藝人何家勁合資,積極開拓內地健康食品市場,預料出年就會喺香港嘅工展會面世嘞。

卓妮

第一手消息請下載on.cc東方互動iPhone/iPad/Android/Windows Phone Apps