曾鈺成尋日出席一個青年論壇時，向在場中學生分享從政之路，佢憶述六十年代上廣州探親，眼見國家滿目瘡痍，令當年就讀香港大學數學系、被視為「天之驕子」嘅佢，畢業後毅然放棄赴美修讀博士，決心留港發展，了解國家，更加入傳統左派學校培僑中學執教鞭，從而扭轉佢嘅一生。
九十年代初，已經擢升為校長嘅曾鈺成，喺幫手籌組民建聯時就因為校長室有部傳真機，方便收發文件而被安排做創黨主席，從此踏上政壇。
鬧人要先做好學問
依家愈來愈多青年不滿政府施政，學貫中西嘅曾鈺成就即場反問有幾多學生認真睇過新一份施政報告，更語重心長咁勉勵學生評論時事前先「做好學問」、鞏固文化知識，以及睇完成份施政報告，咁鬧人先有說服力喎！