中環出更:媽打娶新抱 最緊要「開枝散葉」

前民政事務局常秘李麗娟(媽打)任職會計師嘅兒子劉堃(Chris)尋日小登科,與拍拖六年多嘅律師女友蘇雯華(Miranda)共諧連理,喺灣仔會展筵開七十二圍大宴親朋,卓妮都有去湊熱鬧。媽打笑言,最開心請到香港大學校務委員會主席梁智鴻(金刀梁)獻出「第一次」做見證人,而監禮人就由基本法委員會副主任梁愛詩擔任,二人生日只差一天,名副其實係「梁twins」!

金刀梁話今次係佢自動請纓做見證人,事關佢咩都試過,就係呢樣未做過喎。做得見證人,當然唔少得向一對新人「訓話」。金刀梁話,知道新郎哥工作好忙,唔記得僭建都好,都唔好忘記結婚紀念日,婚後要繼續支持太太發展事業,仲要畀多啲空間屋企個衣櫃喎!

政商名流紛到賀

百足咁多爪嘅媽打娶新抱,唔少退休高官、政商名流嘅好友紛紛到賀,政務司司長林鄭月娥、食物及衞生局局長高永文、久病初愈嘅新界鄉議局主席劉皇發,仲有九十六歲嘅前行政會議召集人鍾士元都獲邀出席,前財爺梁錦松就「借出」兩子一女做花仔花女。一身紫色旗袍配水貂披肩嘅媽打滿場飛招呼親友,佢好開心咁話,住喺美加嘅九兄弟姊妹都專程飛返嚟飲呢餐,又大爆自己一日內忍唔住講咗八次「開枝散葉」,希望阿仔會識做咁話。

新郎Chris一身間條禮服入型入格,新娘Miranda則穿上七萬元嘅Vera Wang婚紗,仲戴住老爺送嘅鑽石頸鏈,幸福滿溢。卓妮見新郎清減不少,佢坦言為咗影相好睇啲,刻意節食同做運動,一個月激減十磅。Chris盛讚太太靚女又善良,最緊要係錫自己。當晚一對新人深情對唱《Endless Love》,場面溫馨。二人透露會去美國度蜜月,承諾會盡快生番個蛇B,等媽咪湊吓孫喎。

卓妮

第一手消息請下載on.cc東方互動iPhone/iPad/Android/Windows Phone Apps