香港嘅駕駛者都知道，開車過海係一件幾咁麻煩嘅事。選擇紅磡海底隧道咩，九成九塞到爆，約人食飯睇戲傾公事隨時遲大到。選擇東隧或者西隧過海係就係冇咁塞，可惜貴到冇朋友，尤其係「食咗人隻車」嘅西隧，收費之貴人稱富豪通道，窮鬼一個二個望而生畏。
紅隧由朝塞到晚已經係長年累月嘅事，到底有乜嘢辦法解決？原本之所以有東隧同西隧嘅存在，目的就係疏散車流，可惜效果絕不理想，收費有別係其中一個關鍵問題。既然係咁，要求政府回購兩條隧道嘅呼聲不絕如縷，因為回購之後就可以訂出一個冇咁大分別嘅收費機制。
哈，特首梁振英第一份施政報告冇錯係提到要長遠及全面規劃本港交通運輸，務求達到三隧分流，之但係你估具體做法係點樣吖嗱？施政報告話喎，市民一直關注海底隧道塞車，政府經過公眾諮詢以及顧問研究之後，已經準備好紓緩擠塞方案，大方向係透過紅隧加費補貼東隧減費，今年上半年將會諮詢公眾，包括立法會、交諮會、區議會同運輸業界等等。
紅隧現時每日車流量大約十二萬架次，東隧係七萬架次，如果能夠每日將紅隧兩萬架次車輛吸引到東隧，此消彼長之下就可以拉近兩條隧道嘅車流，有助解決煩不勝煩嘅塞車情況。不過問題係，紅隧加價再補貼東隧減價，等於以公帑補貼私營隧道公司，做法合唔合理先？算唔算另一種利益輸送先？你知啦，官商勾結好大罪o架，萬一又爆出東隧老闆同政府高官過從甚密嘅腐敗醜聞，好似過氣特首曾蔭權搭上超級富豪吃喝玩樂一樣，咁就大大鑊嘞！
即使撇開官商勾結嘅陰謀論唔講，單計公帑補貼私營隧道公司，相信唔少駕駛者同納稅人條氣都唔順囉。仲有喎，假設東隧透過公帑補貼而減價之後，平均從每架車得到嘅利潤不變，額外吸引更多車流咪即係賺得更多？換句說話嚟講，公帑補貼除咗令到東隧封實蝕本門，更加會令到呢一間公司豬籠入水，利用公帑錢搵錢化作私利，好似唔多啱數喎，吓話？
計功夫茶話齋，若然東隧減價真係可以吸引更多車流，點解唔直接要求東隧減價呢？薄利多銷呢家嘢，一家便宜兩家着，政府冇必要以公帑補貼咁傻瓜瓜啫。
其實講到尾，政府回購東隧同西隧係最有利於小市民嘅做法，唔好任由兩間隧道公司餐餐都瘋狂加價撳住搶吖嘛。梁朝政府口口聲聲「穩中求變、務實為民」，何不將公帑用於務實嘅回購行動？咁先至係貫徹民生無小事嘅宗旨吖嘛！