自從九十年代開始，泛民主派部分人好似民主黨何俊仁、劉慧卿、支聯會主席李卓人等都被沒收回鄉證，一直返唔到內地。不過，早前港區全國人大代表鄭耀棠突然對外放風，話可以幫班泛民取回回鄉證，此話一出隨即惹來政界揣測，以為中央想畀啲甜頭班泛民。
直到尋日立法會特首答問大會，民建聯（民記）李慧琼再問特首梁振英（CY）會唔會幫泛民議員攞番回鄉證，原來係另有玄機。聽聞未來一兩年，政府有意搞多啲中港交流活動，其中一項可能係帶班立法會議員返內地考察，最大機會就係仍然係爛地一塊嘅前海發展區域。呢類考察以往都試過舉辦，但次次焦點都落咗喺班冇回鄉證嘅議員身上。聽聞中央願意釋出善意，有機會發還回鄉證畀佢哋，一來等班冇證泛民議員無得再嘈，二來令班有證嘅泛民議員可以名正言順返大陸，唔使偷偷摸摸，以收統戰之效。
李慧琼問完後，CY都冇應承，只係話主觀上願意盡最大努力協助，但客觀條件要大家共同創造。到底民記係咪收到風中央想咁做，然後扮成功爭取呢？民記主席譚耀宗就叫大家千祈唔好咁諗，佢話既然部分泛民都想有回鄉證，咪試吓叫政府幫手向中央爭取囉！