政情：公民講場：周一鑊爛帳 港人填氹

醫院管理局日前發表嘅上年度年報顯示，內地居民使用本港公立醫院服務後「走數」情況有惡化趨勢，呆壞帳金額高達三千一百萬元，而涉及內地孕婦嘅撇帳額亦高達五百八十萬元，共有二百五十名內地孕婦走數，平均每人拖欠約二萬三千多元。眾所周知，呢幾千萬元壞帳全部都係人稱「周一鑊」嘅前食物及衞生局局長周一嶽留低嘅炸彈，因為佢把關不力，令公立醫院變成冇掩雞籠，有人食完「霸王餐」都冇人理，最終要納稅人付鈔執手尾。不過，可恨嘅係周一鑊就攞埋局長約滿籌金拍吓屁股就鬆人，而醫管局高層就繼續加人工，一於話之你。