政情:普通話不靈 馮檢基累街坊

政壇人物經常要接受傳媒採訪,兩文三語最低限度都要見得吓人。尋日一個電台普通話台就請咗民建聯立法會議員蔣麗芸(Ann)、工程界盧偉國(WK)同民協馮檢基上節目辯論新一份施政報告。

雖然阿Ann同WK嘅普通話有番咁上下,但佢哋竟然要經常轉語音頻道,講幾句普通話又跳去講廣東話,搞到聽眾一頭霧水,原來係因為阿基全程都講廣東話而累事。

唔知阿基係咪自知普通話水平好普通,喺節目一開始就索性講晒廣東話,博啲電台聽眾聽得明廣東話。阿基力數施政報告冇料到,而阿Ann就以半普通話半廣東話應對,例如佢用普通話講「不少市民認為太多注意力放在建房子上面去」,之後突然轉台講廣東話「佢哋話政府成日起屋起屋,可唔可以講吓其他呀?」

可能佢哋覺得廣東話溝普通話未夠刺激,阿Ann為幫特首梁振英護航,先用普通話講「我知道」三個字,之後轉用廣東話:「我知道你叫『九龍秦始皇』吖嘛!」阿基聽到隨即反駁話:「呢個(名)係你叫咋嘛!」又向主持人投訴話:「佢(Ann)都唔畀我講嘢嘅!」總之全程不斷轉語音頻道外,仲搞到聲疊聲,苦了收音機旁邊嘅聽眾,今次電台係咪請錯阿基做嘉賓呢?

第一手消息請下載on.cc東方互動iPhone/iPad/Android/Windows Phone Apps