政情：自爆收50萬 人力捐款透明化避猜疑
人民力量（人力）前日喺網上公開宣布收到五十萬元巨額捐款，原來呢筆捐款有段古。人力主席劉嘉鴻透露，去年底有支持者親臨黃毓民地區辦事處，話想捐錢畀人力，議員助理當時隨手提供咗人力個銀行戶口，點知對方真係入咗五十萬元落人力戶口，為大家帶來驚喜。
至於點解人力會公開收咗筆捐款，主因係早前收咗建制派一筆捐款後惹來外界批評及猜疑，所以人力執委會早前通過動議，規定日後收到六位數字或以上捐贈，都要喺網上公開詳情，方便市民監察。過去政黨經常被批評收咗幾多捐款都冇人知，所以今次人力踏出第一步將捐款透明化，其他政黨或政團應該學習吓喇。
派林匡正補選
另外，因為民建聯劉江華出任政制及內地事務局副局長而懸空嘅沙田區議會田心選區議席，將於三月進行補選，提名期今日開始，民主黨今朝會搶閘報名。盛傳有意加入戰團嘅人力已經敲定人選，派出做過人網主持同出過書嘅林匡正出選。據了解，雖然人力明白林匡正知名度唔高，但認為住喺田心嘅佢同當區關係密切，絕對有利選情。