政情：民記工聯搶撲樓火
特首梁振英（CY）新政府早前推出買家印花稅及加強版額外稅，被地產商視為應付過熱私樓市場嘅「辣招」，立法會工商界議員即時群起加入條例草案委員會把關。不過，另一邊廂民建聯（民記）同工聯會都分別派出五人及四人加入委員會，擺明向運輸及房屋局局長張炳良大派「定心丸」，可以放心與地產商戰鬥。
地產建設商會最近不時出招，務求迫使政府喺買家印花稅上讓步，據聞呢場印花稅之戰嘅火藥味已經蔓延至立法會，事關有份審議「辣招」細節嘅立法會《2012年印花稅（修訂）條例草案》委員會，前日午夜十二時限期前竟然有多達廿八名議員加入，大致可分為對買家印花稅有保留或反對陣營，以及「挺梁」陣營嘅大對決。
工商界陣營方面，至少有六人加入委員會，包括商界林健鋒、工業界梁君彥及林大輝、地產建造界石禮謙等人，佢哋主要爭取本地公司可用公司名義買入住宅單位，並非炒賣應豁免繳交買家印花稅，加上泛民主派梁家傑等人亦對買家印花稅有部分保留，呢個陣營大約有十至十一人。
「挺梁」陣營方面，民記係大戶有五人，包括對挺梁不遺餘力嘅民記副主席蔣麗芸、行政會議成員李慧琼等，連一向少有就稅務問題插手嘅工聯會都精銳盡出，「雙料議員」陳婉嫻同工聯會副會長黃國健都喺名單之內，加埋曾經提名支持CY嘅旅遊界姚思榮等人，「挺梁派」都有至少十人，同反對及有保留嘅陣營有力一拚。
條例料最終通過
事實上，「挺梁派」近半年都力挺新政府向地產商「開刀」嘅政策，有人話CY有恃無恐，底因係有消息指CY提出嘅土地同房屋政策已得到中央首肯，張炳良有呢個「定心丸」加上「挺梁派」力撐，相信通過印花稅修訂條例問題不大，但無可避免要經過一番討價還價嘅過程，仲要睇少眼都唔得。