中環出更：顏吳餘英驚嘆首爾發展神速
中華廠商聯合會副會長顏吳餘英（Katherine）早前趁住節日假期漫遊韓國首爾，初嘗零下十四度嘅冰凍滋味。佢話已經二十幾年冇踏足當地，今次重臨，驚見首爾進步神速，由以往只做加工，至今已自立多個電器、電子、汽車等國際知名品牌，發展真係一日千里，順帶希望港府借鏡當地嘅發展經驗。
Katherine認為，首爾經濟發展之所以如有神助，全因當地政府大力支持同配合。本身從事玩具業嘅佢話，業界現正面臨轉型及競爭壓力，如果缺乏政府嘅支持，單打獨鬥實在難以發展所長。Katherine又話，其實只要有政府資助，好多行業一樣可以出類拔萃，甚至舉世聞名，所以好希望港府可以借鏡首爾，提供多啲資源及支援畀各行各業。
化妝品平靚正
講番首爾之旅，Katherine除咗大擦韓燒及地道美食外，仲掃咗唔少化妝品，滿載而歸。佢大讚韓國化妝品款式多，售價更比香港便宜一截，好似喺香港賣過百元嘅面膜，當地只售十多元，唔怪得咁多人過去掃貨喇。