中環出更：唐偉章夢想做機師
為香港航空業培育人才嘅香港航空青年團（航青團），早前舉行周年籌款晚宴，各大慈善團體包括圓玄學院、博愛醫院及仁愛堂等齊齊鼎力支持。英挺有型嘅機師，係好多男士小時候嘅夢想，當晚應邀做主禮嘉賓嘅理工大學校長唐偉章笑稱自己都唔例外，只係後來執起教鞭做教授，就淡忘咗呢個夢想喇。
不過，依家年輕人唔使再因為要應付升學，而遺忘咗呢個雄偉嘅理想，事關理大與波音公司已簽署合作備忘錄，設立全港第一間「航空服務研究中心」，提供世界級嘅飛機維修及航空航天課程。唐偉章仲透露，未來打算將有關課程轉為學位課程。咁佢做唔成機師嘅遺憾，咪可以寄託喺理大學生身上囉！
當晚圓玄學院副主席兼前博愛醫院主席湯修齊（Henry）都買枱捧場，仲叫埋博愛副主席陳李妮（Lily）共襄盛舉。Lily自爆做咗海南省政協，首次躋身政壇嘅佢，笑言要多啲學習。
Henry係航青團榮譽中校，雖然唔識揸飛機，但志在為青少年教育出分力，為中學以上嘅年輕人提供航空知識外，亦着重紀律及領袖培訓。
陳鑑光要考飛機牌
晚宴籌委會主席兼仁愛堂副主席陳鄭玉而，除咗邀請一眾手足撐場外，佢老公東保集團主席陳鑑光（Charles）亦陪伴打氣。
Charles係航青團榮譽中校，佢決定本月底到加拿大報讀相關課程，朝考取小型飛機駕駛牌照努力，希望有朝一日可以坐上駕駛艙，載住航青團嘅學生們展翅高飛。
卓妮