政情:收料站:新增九委員會高靜芝忙搵人

中央政策組顧問高靜芝加盟中策組後,首要就係做好人才庫工作,亦有份畀意見搵人加入政府各大委員會及諮詢組織。特首梁振英(CY)尋日喺施政報告中宣布成立至少九個委員會,大家於是驚覺,原來高靜芝嘅工作咁繁重,除咗今日公布嘅經濟發展委員會委任名單外,睇怕其他委員會嘅人選都有排物色。

CY尋日一口氣公布成立至少九個委員會,包括「漁業持續發展基金」委員會、檢討醫管局運作督導委員會、推動綠色建築跨部門督導委員會等,其中今日公布委任人選嘅經濟發展委員會,仲會下設航運業、會展同旅遊業、製造、高新科技同文化創業產業、專業服務業等小組,又要兼顧用人唯才,又要不違反不成文規定嘅「六六原則」,真係一時三刻搵人都唔係咁容易。

據聞,身負搵人才重任嘅高靜芝,近日又開始密密見人,同埋搵合適嘅人選去提供畀當局參考。

有政界中人想自薦

但有政界人士大呻,根本唔認識高靜芝,更加遑論會獲得垂青加入政府委員會,所以要四周圍睇吓有冇人可以幫手向高靜芝引薦。

唔知道最終呢九個委員會,公布委任人選時,支持CY嘅「梁粉」會否一如既往成為委任「大戶」呢?

第一手消息請下載on.cc東方互動iPhone/iPad/Android/Windows Phone Apps