政情：今日你上鏡：唔做花生友
花生，係睇戲嘅良伴，剝住花生等睇戲，係人生一大樂事。作為政界一個極具戲劇性嘅人物，政制及內地事務局副局長劉江華嘅出現就經常令花生供不應求。當日立法會落選就旋即有市民自備花生上門到賀，戲味之濃令花生需求激增。雖然劉江華同花生形影不離，但我哋尋日發現，原來劉副局長唔好食花生。
尋日我哋喺政府總部餐廳遇到劉江華食早餐，見佢食花生粥做早餐，但就食剩好大碗花生。點解佢食剩晒啲花生呢？莫非佢唔鍾意食花生？抑或特登留番畀多位花生友呢？但呢位新任副局長似乎工作得好開心，雖然佢話仲適應緊新工作，但見佢笑到見牙唔見眼，應該工作都幾愉快，至少逗人工逗得開心啦。