政情：象哥部署自己友接班
立法會換屆冇幾耐，但已經傳聞有議員鋪路搵定接班人，講緊嘅係民建聯（民記）立法會進出口界議員黃定光（象哥）。話說象哥代表嘅中華出入口商會（中出），今年啱啱選出新一屆常務會董，發現本身唔係做廠商嘅青年民建聯主席周浩鼎榜上有名，聽聞係獲象哥一手提拔，而且象哥對外仲猛讚佢係自己嘅左右手，莫非暗示緊畀佢接班？民記係咪又想將中出個議席據為己有呢？
象哥捱義氣頂替許華傑
去年立法會選舉前夕，本來傳出象哥會讓位畀較年輕嘅中出副會長許華傑，因為當年許華傑爸爸許長青都係代表中出嘅立法會議員，但係後來因病冇再參選，先由象哥頂上，所以今屆理應由許華傑接棒。至於點解最後都係由象哥冧莊做多屆，政界傳出兩大版本，一個係許華傑媽媽想個仔專心做生意；另一版本就係話象哥擔心畀許華傑接班會引起部分人不滿，所以捱義氣做多一屆喎。
不過，無論邊個版本係真都好，其實計埋今屆立法會，象哥已經做咗三屆議員，下屆退下火線都可以理解，而佢特登提拔周浩鼎加入中出做常務會董，即時惹來揣測。做得中出常務會董嘅，個個都係開廠或做出入口生意嘅，唯獨周浩鼎係律師，箇中玄機真係耐人尋味。如果大家有留意嘅話，周浩鼎個個星期都有去《城市論壇》打躉，發表意見以增加人氣。
周浩鼎：未來事冇人知
周浩鼎好坦白話，日後嘅嘢冇人會知，但目前會跟住象哥學嘢，因為近年做埋民記工商事務政策副發言人，要同商會人士多多溝通，咪順理成章做埋中出會董囉。到底象哥想許華傑定係周浩鼎接棒呢？相信過多一年就會清晰啲。
講起中出，今年佢哋會同海南商會首次贊助農曆新年嘅煙花匯演，叫做幫中出打響頭炮。據聞今次煙花加埋激光元素，呢個技術過去未試過喺香港出現，估計費用最少要過千萬元。不過，幾貴都唔緊要啦，事關每年農曆新年煙花贊助都爭崩頭，今年中出爭贏，證明佢哋喺商界影響力不容忽視。