中環出更：何志恩設計 堅守個人風格
內地消費市場龐大，商人設計產品時難免會迎合內地消費者口味，但著名時裝設計師何志恩（Johanna）尋日出席一個分享會時話，堅持唔會因此而改變個人設計風格。Johanna坦言，喺商業同理想之間確實難以取得平衡，但如果連自己嘅設計都被人牽住鼻子走，就會失去個性，所以若要建立一個成功品牌，首要條件就係要堅守個人嘅獨特之處。
Johanna覺得，以前時裝設計師創造嘅，係一個天馬行空、玩味十足嘅「夢」，只會喺時裝騷「天橋」上見到，基本上唔着得出街。依家則反受消費者啟發，趨向現實主義，唔少國際服裝品牌嘅設計相對保守，而佢就希望跳出只為明星做形象設計嘅框框，為真實嘅大眾設計服裝。
Johanna笑言，十年前嘅世界仲係崇洋心態，當年佢初入行，身為中國人卻被迫冠以倫敦品牌之名，依家終於可以吐氣揚眉，近年於本地開設個人品牌時裝店及網上商店。問Johanna今年服飾趨勢，佢話自己不嬲都唔講潮流，只求着得好睇同有自信，識得搭配先至係潮流之道。