政情：發叔復出無咁好氣
「新界王」劉皇發因為大感冒要住院兩星期，絕迹政壇差唔多成個月，無論係立法會定鄉議局，都唔見佢老人家蹤影，搞到好多政界中人都對發叔健康議論紛紛。發叔尋日終於現身闢謠，佢話自己雖然感冒未清，把聲唔夠中氣，但後日星期三都會去立法會聽特首梁振英讀施政報告，叫大家唔使擔心。
講明返立會聽施政報告
由於發叔太耐無現身，加上佢今年踏入七十七歲，所以外界非常關注佢動向，尋日民建聯主席譚耀宗喺屯門開辦事處，畀人踩入地頭，發叔點可以唔出現呢？發叔雖然唔多覺有減磅，但唔知係咪住得醫院太耐，明顯成個人「謝」咗唔少，無以前咁精神，無論係舞獅定剪綵，發叔都好似吽吽地咁，無乜心機。
有記者問發叔依家身體點樣，發叔都耍手又擰頭，一味指住自己喉嚨，話醫生叫佢唔好講咁多嘢，不過佢又向大家大派定心丸，細細聲話雖然仲有幾聲咳，但只要定時食藥就得，仲話自己後日將會「復出」聆聽梁振英讀施政報告。但民建聯怕發叔唔小心凍親或跌親，尋日派出屯門區議員吳觀鴻做發叔「扶手專員」，都算唔話得啦。