伊利沙伯醫院今年踏入啟用五十周年，尋日舉行金禧紀念活動開幕禮，前食物及衞生局局長周一嶽（周一鑊）都係座上客。尋日風和日麗，不過周一鑊就好似唔多鍾意同陽光玩遊戲，戴住一頂鴨舌帽、一副太陽眼鏡，務求完全隔絕紫外線。直至上台主禮，一鑊終於瀟灑脫帽，點知啲頭髮就因為被壓得太耐，得番個窿，仲有一條鴨尾跟住佢添。佢夜晚出席另外一個活動，話依家得閒就會去學唱意大利歌喎。學吓唱歌打發吓時間都好嘅，但如果想上台表演就最好唔好嘞。
（黃仲民攝）
