政情:簡永輝拖老外 親密蒲老蘭

著名冠軍練馬師簡炳墀嘅孻仔大律師簡永輝(Terry),被卓妮發現佢喺本周二凌晨十二點半鐘,喺中環同一名外籍男友人孖住夜蒲蘭桂坊,期間二人頭貼頭「咬耳仔」、手牽手行街,態度親密,離開分手前仲表現得難捨難離,睇嚟感情唔錯。

當晚戴住鴨嘴帽嘅Terry現身蘭桂坊,一身中褸牛仔褲加長靴打扮,同上周六接爸爸出獄嘅裝束幾乎一模一樣。佢同一名身穿冷衫孭住背囊嘅男性外籍好友,坐喺一間開放式酒吧近門口位置,肩並肩面向外。Terry望落心情靚爆,同好友一邊歎啤酒,仲柯打咗一支水煙兩份吸。吞雲吐霧之際,Terry興致勃勃咁拿出手機,與好友頭貼頭玩自拍,之後兩人低頭對合照喁喁細語,討論得興高采烈。

玩咗成個鐘頭,Terry與好友始起身離開,男友人似乎對Terry依依不捨,輕輕擁抱對方之餘,更細心幫Terry整理衣服。Terry亦盡顯君子風度,過馬路時主動拖實男友人隻手,仲為對方截的士。

等咗幾架的士之後,男友人終於等到車,臨走前他不忘與Terry擊掌,再來一個十指緊扣,維持數秒至放手。喺送走男友人之後,Terry獨自走向擺花街,到自動櫃員機提款,冇幾耐佢再走向荷李活道,最後走入一間大廈。

五官端正仍未婚

現年三十七歲嘅Terry五官端正,至今仲係未婚,可謂「鑽石王老五」,而據Terry身邊嘅人話,亦唔清楚佢有冇女朋友喎。

卓妮尋日曾致電Terry,問吓佢夜蒲蘭桂坊一事,但未能聯絡上;之後卓妮亦打過電話畀簡Sir,簡Sir亦似乎不欲多談而掛線。

第一手消息請下載on.cc東方互動iPhone/iPad/Android/Windows Phone Apps