政情:上次甩底釀流會 「稱病」議員歸位

立法會發展事務委員會上月討論特首梁振英大宅僭建,但因為多位議員離奇遲到或缺席而流會,部分「甩底」議員事後急急道歉補鑊,甩底原因千奇百趣,不過部分聲稱患流感、病到嘔嘅議員尋日復會時都準時歸位,只有極少數議員堅持曠工,仲唔解釋原因。

成員有三十二人嘅發展事務委員會,上月會議由於得九位議員準時現身而流會,成為立法會新一屆會期首個流會會議,認真失禮。原本患上支氣管炎嘅新民黨葉劉淑儀、真係忙到嘔嘅工聯會麥美娟,同早前因病入院嘅民協馮檢基等人,經過流會一役都即時增強抵抗力,廿六人齊齊以強健體魄出席尋日會議,個會終於開得成,唔通流會真係能醫百病?

葉國謙冇影 懶得諗藉口

不過部分尊貴議員喺兩次會議都冇咗影,民主黨劉慧卿理直氣壯話加入委員會係為咗新界東北發展計劃,其他嘢講明唔理。民建聯葉國謙更只拋低一句「嚟唔到咪嚟唔到囉!有乜點解?」連藉口都懶得諗。委員會主席劉皇發就仍然請假,改由上次宣布流會嘅副主席謝偉銓主持會議,證明佢嘅病,係珍珠都冇咁真!

第一手消息請下載on.cc東方互動iPhone/iPad/Android/Windows Phone Apps