政情：「梁粉」新春酒會早成個月？
特首梁振英（CY）喺施政報告公布前，相約眾「梁粉」到禮賓府聚會，明眼人都睇到係「梁粉」答謝會，但眾嘉賓離開時竟異口同聲話呢個係新春酒會。下月十日先農曆新年，依家提早成個月搞新春酒會，真係講都冇人信。
李家仁唱《小明做特首》力挺
講番個酒會，逾百名出席者清一色都係「梁粉」，包括行政會議成員張志剛、全國政協委員劉夢熊、明天更好基金行政總裁鄧淑德、「票王」北區區議員劉國勳等，連最近懷疑捲入元旦「挺梁」遊行派錢風波嘅新界總商會，其會長張德熙都無受傳聞影響照出席。
CY搞得呢場「大龍鳳」，大家都期望佢會為施政報告露吓口風，但最終都令出席者失望，因為據引述，CY只係重申施政報告不會「派糖」。出席酒會嘅兒科醫生李家仁引述CY話，期望施政報告公布後，社會唔只得一面倒聲音，又希望沉默大多數發聲，平衡民情同輿論。當被問到CY僭建問題時，李家仁忽然唱出《小明做特首》力挺CY，確係忠實「梁粉」。