政情：區會「陳妍希」凍影婚照
一直低調拍拖嘅民建聯中西區區議員蕭嘉怡（Kathy），前日喺社交網站正式宣布婚訊，附上同未婚夫喺雲南麗江玉龍雪山影嘅婚紗照，隨即惹起網上哄動，因為有唔少人話佢驟眼睇落有啲似清純可人嘅「宅男女神」陳妍希，依家Kathy結婚在即，難怪佢黨友中西區區議會副主席陳學鋒留言打趣話，該黨一定會流失大量年輕男性選民喇！
據聞Kathy同未婚夫同樣係珠海新聞系同學，由於Kathy嘅另一半鮮有喺網上曝光，因此婚照上載後，親朋好友即時讚好，不足一日按鍵讚好嘅人次已經超過四百五十人，留言表示恭喜嘅亦好多，有人私下仲大讚Kathy呢輯相個樣好似台灣紅星陳妍希添。
對於畀人話似「宅男女神」，Kathy自言唔似對方亦冇咁靚，但都連番多謝大家稱讚喎。講番張雪景婚紗照，佢話特登揀咗去年五月，玉龍雪山啲雪就嚟融嘅時候去影，前後影咗一個鐘，為咗保暖佢貼咗十個暖包，至於幾時會正式擺酒結婚，佢話計劃喺農曆新年前，希望趕及派利是喎。