政情：林鄭 楊立門零交流 李焯芬逼做夾心人
官場一直流傳做過民政事務局常秘嘅政務司司長林鄭月娥同現任常秘楊立門唔咬弦，楊立門幾年前仲因為咁而毅然走去進修。其實兩人過去多次出席活動時已面左左，尋日佢哋出席衞奕信勳爵文物信託二十周年活動時再度狹路相逢，零交流都唔係重點，楊立門全程刻意避開林鄭，仲搞到信託委員會理事會主席李焯芬成為佢哋嘅磨心。
話說大會已經好細心咁安排李焯芬坐喺林鄭同楊立門中間，點知林鄭一支箭咁「唔小心」坐咗李焯芬個位，楊立門即時臉色一沉，猛打手勢叫李焯芬坐番自己個位，之後林鄭要「自動波」向左移番去自己個位，典禮先可以正式開始。典禮後眾人例牌影張大合照，李焯芬特登行埋一邊，等兩位高官可以企埋一齊影張靚相，但楊立門繼續耍手擰頭，猛打手勢叫李焯芬企番喺佢同林鄭嘅中間。
當時林鄭嘅目光朝楊立門方向望咗一眼，但呢一眼收得特別快，好似唔想畀人知道佢望過呢位前下屬咁，之後佢就寧願眈天望地，都唔肯同楊有眼神接觸；而楊立門亦冇主動同林鄭握手，唔知李焯芬事後有乜感受？