新年流流，有人快樂有人愁。假如閣下豐衣足食又擁有美滿家庭，新年梗係快樂啦，問題係貧富懸殊嚴重到有口皆「悲」，窮等人家搵朝唔得晚，何德何能歡度快樂新年呢？跟住嘅農曆新年，嗷嗷待哺嘅飢餓人口都唔知點算好呀。
教宗本篤十六世主持元旦彌撒發表新年講話，佢係咁講㗎，貧富懸殊愈來愈嚴重，自私嘅人性衍生出不受監控嘅金融資本主義，加上恐怖主義折磨呢個世界，但人性對和平有與生俱來嘅傾向，為世界帶來善行，祈求今年迎來世界和平。
冇錯，人性係自私嘅，所以金融資本主義造成百物騰貴，尤其係樓價同租金蠶食咗打工仔一大部分嘅收入。好彩，人性又為世界帶來善行，所以會有菩薩心腸嘅民間團體營辦食物銀行，為有需要人士提供食物援助，咁先至避免香港呢一個表面風光嘅國際大都會出現路有凍死骨嘅尷尬情況。
特區政府喺○九年撥款一億元資助五間機構推出短期食物援助計劃，即係一般所講嘅食物銀行，至今向超過十四萬四千人提供援助。好衰唔衰通貨膨脹惡過老虎，人性難免自私嘅業主又大幅加租，搞到阮囊羞澀嘅有需要人士愈來愈多。營辦食物銀行嘅機構話呀，求助個案增加兩成三至三成不等，重複申領嘅個案亦由過去佔整體嘅七成增加至七成半。為咗餵飽更多嘅飢餓人口，有機構實施新限制，規定每人最多一年只可以申領三次。簡單咁講，窮等人家向食物銀行伸手攞飯嘅數目創出金融海嘯以來嘅新高！
喂，十幾萬人屬於三餐不繼嘅飢餓人口，香港仲有乜嘢資格自稱富庶社會呀？唔好唔記得，好多人窮得非常有自尊，寧願自食其力都唔會求助於食物銀行，所以實際嘅飢餓人口隨時係幾十萬o架。
好嘞，扶貧委員會話就話鹹魚翻生，由執笠大吉變番做開工大吉，之但係有冇實際行動幫助窮人脫貧呀？功夫茶只係記得，特首梁振英話會設立一條貧窮線喎，可惜呢一條線經過一班高官專家討論來再討論去，家陣都未有定案。
咁就死火啦，最近有一套改編自法國大文豪雨果名著《悲慘世界》嘅電影上映，故事情節好清楚咁話畀大家聽，人民一肚餓就會革命，仲要將罔顧民生嘅皇帝送上斷頭台。特區政府嘅問責高官如果唔想做另一個腦袋搬家嘅路易十六，真係要切切實實做好扶貧工作，千方百計餵飽怨氣沖天嘅飢餓人口。你知啦，香港已經係一個動不動就上街抗爭嘅示威之都，萬一扶貧委員會再次淪為空談部隊，齋噴口水吊吊揈，冇人夠膽保證貧窮大軍唔作反o架！