港大民意研究計劃調查指出，最多市民希望香港成為廉潔社會。有關調查稱，在繁榮、廉潔、公平、自由同福利之間抉擇，百分之三十一受訪者最希望廉潔，數字係一九九三年調查系列開展以來嘅歷史新高。
好明顯，用常識判斷，皆因前任特首、高官、公職人員，過去一年被揭涉利益衝突特別多，尤其貪曾，不但貪盡海陸空，食盡省港澳，連一雞一菜都來者不拒，貪婪成咁，有乜辦法唔激起港人特別關注呢個「廉潔奉公」嘅核心價值竟壞在貪曾手上啊！一個缺乏公平公正的社會，一個以權謀私的社會，邏輯上意味着任何人的權利都可以被剝奪。活在這樣的社會，人民自然不會幸福！香港嘅廉潔排名，一向唔錯，之不過，自從來了個貪曾，加上高官接二連三涉及貪污，排名已一降再降。「香港，勝在有ICAC」，老朽真係唔希望佢又變成笑柄！
廉署打大鱷向來予人行動果斷，英明神武嘅形象，可惜立案查貪曾，竟然大半年連屁都未放過一響，使不少市民懷疑是否「刑不上大夫」，甚至乎以為ICAC已經不存在！
咁搞法，香港呢個法治之區，如果再談「廉潔」，就有如太監談性！即係自己風花雪月，談得高興，別人看了好笑。那檔子事情當然不是廉政公署的錯，但不要裝作有鳥的樣子好不好？
貪曾人走茶已涼成霜，ICAC立案查了大半年，拿腔拿調好歹出來說句進展，以釋市民疑慮啊！切勿立案把File放一旁，就以為沒有貪污也！