驚接案件得罪政府
話說沙田車公古廟嘅業權自八十年前嘅一宗法庭判決，被判歸政府所有後，政府就堅持合法擁有業權。不過，沙田鄉事委員近年就話，車公古廟嘅業權曾經屬沙田「九約大眾」，亦即沙田鄉九約嘅原居民所有，因為喺土地註冊處文件都曾經係咁寫。只係後來港英政府避免村民為車公古廟業權爭執，當年嘅理民府就從車公廟兩位司理手上收歸業權。
直至沙田原居民半年前向法院提請司法覆核，但聽聞好多大狀都話唔敢接呢單案件，因為費事同政府過唔去喎，正因為咁，提出司法覆核一方暫時只好邀請喺英國執業嘅大狀睇法律文件，至於出庭嘅大狀就要慢慢搵喇。話時話，乜大狀都會驚得罪政府嘅咩？定係唔想接法援嘅案件呢？