古物諮詢委員會（古諮會）大換血，注入唔少「梁粉」。政府尋日宣布委任規劃師林筱魯接替陳智思做古諮會主席，另委任十二位新成員，最矚目係做過梁振英競選辦副主任嘅香港明天更好基金行政總裁鄧淑德、新昌營造前非執董陳家駒、中西區區議員陳捷貴、香港大學城市規劃及設計系教授趙麗霞、中文大學建築學院院長何培斌、建築師廖宜康、會計師盛慕嫻、互聯網專業協會（iProA）前會長鄧淑明等。
外界一般以為「梁粉」獲委公職或加入諮詢組織好着數，但林筱魯話，古諮會未來要完成餘下嘅歷史建築物評級工作，亦都希望檢討保育政策。佢又話，接任主席遇到嘅風波總會有，亦有心理準備面對多方面壓力。
至於辭任古諮會主席嘅行政會議成員兼港區全國人大代表陳智思（Bernard），旋即翻兜做社會服務聯會主席，有傳佢係想減少自己惹禍嘅機會，以免影響個人形象，為將來競選特首鋪路。
不過，Bernard向我哋澄清，絕無專揀啲少爭議嘅公職嚟做，否則就唔會繼續做可持續發展委員會主席，事關處理固體廢物徵費係個燙手山芋，要執行垃圾徵費十分複雜同困難，隨時會得罪好多人喎。