民陣元旦日搞「倒梁」遊行，撐政府團體「愛港之聲」就打對台喺政府總部搞嘉年華會「挺梁」，而佢哋嘅召集人高達斌仲被發現原來係新民黨黨員添。新民黨主席葉劉淑儀尋日話，佢同呢位黨員唔熟，雖則人人都有行使言論自由嘅權利，但日後如果黨員再搞類似活動嘅話，都係預早同佢打聲招呼好啲。
高達斌近日頻頻以「愛港之聲」名義發起「挺梁」活動，可以話係忽然彈起，但葉太就似乎同呢位黨員保持距離，話大家唔係好熟，但經了解後知道高達斌都係自發性咁搞活動。葉太又話，人人都有言論自由，高達斌都係支持政府同行使自己嘅權利啫，冇影響到黨嘅聲譽，所以唔會有咩紀律處分。不過，基於高達斌嘅「雙重身份」，葉太就話黨員搞類似活動嘅話，禮貌上同黨講聲會好啲喎。
葉太喺之前聖誕節同囡囡葉榮欣去咗新加坡玩，點知佢嫌人哋啲景點唔好玩，主題樂園仲細過香港，連住酒店都搵番香港品牌嘅酒店，認真要求高。