政情：緬甸回港肚屙 梁繼昌父女禍從口入
緬甸反對派領袖昂山淑姬當選國會議員，搞到公共專業聯盟梁繼昌（Kenneth）就特意同屋企人喺聖誕假期去仰光遊覽，佢原先諗住臨走前去全國民主聯盟總部見吓昂山淑姬啲親信，但點知內陸機延遲開出，搞到佢一到仰光就要急急腳搭飛機去曼谷轉機返港。更加倒楣嘅係，佢喺當地飲咗啲唔乾淨嘅乳酪果汁Papaya Lassi，同囡囡返港後齊齊肚瀉。
全家幫大笨象沖涼
Kenneth解釋，緬甸嘅陸路交通唔算發達，旅客多數會搭內陸機往來唔同城市，但呢啲內陸機會好似搭巴士咁站站停，所以誤點情況時有發生。佢又話，由於緬甸經濟持續低迷，機場設備簡陋，乘客可以喺跑道周圍行來行去，非常危險。
雖然見唔到昂山淑姬嘅親信，但Kenneth一家就去咗Kalaw附近嘅森林幫大笨象沖涼。Kenneth話，啲原住民會叫大笨象行入條河跪低，遊客就可以用竹筒同刷幫啲大笨象洗背。Kenneth之後仲去咗行山兼坐船遊湖，足足玩咗成個星期先捨得返香港。