政情：SoCO唔遊行 遭文革式批鬥
遊行集會、表達訴求係普羅市民嘅權利，但原來唔參加遊行、唔去示威抗議就等於唔行使公義。話說民間人權陣線喺元旦日發起遊行，但作為遊行請願常客嘅社區組織協會（SoCO）就冇參加。點知有電台節目主持就好似文革批鬥咁，話SoCO唔參加民陣遊行係因為SoCO主任何喜華係「梁粉」，質疑SoCO已變節，由壓力團體變為建制派咁話，激到SoCO幹事施麗珊紮紮跳，隨即反駁節目主持。
質疑變節做建制派
SoCO過去一直都關注基層市民問題，劏房戶、露宿者、綜援戶等問題都係走在最前線，所以佢哋亦經常參加或自發遊行請願。之不過元旦日嘅倒梁大遊行，SoCO就冇參加到，點知咁就惹嚟麻煩，畀商業電台節目「左右大局」主持人質疑。主持人喺元旦遊行完結當晚就喺節目中打電話畀施麗珊，批評SoCO唔參加民陣遊行係因為何喜華做咗「梁粉」，仲擔任埋扶貧委員會成員，質疑佢哋已經變成建制派。
施麗珊就反駁話，SoCO每次遊行都要問街坊意見，睇吓值唔值得參加，並非每次都跟大隊咁人行我行。佢哋今次唔參加係因為民陣擺明「倒梁」，針對特首梁振英（CY）個人，但街坊就覺得CY上任以來推出咗唔少民生措施，大家都想睇吓佢做唔做到先。至於話何喜華係「梁粉」，施麗珊就直言，明明特首競選期間都有邀請其他候選人落區，只係CY肯出席，而何喜華喺上兩屆政府都係扶貧委員會成員。
雖然施麗珊已經清楚解釋，但主持人都係咬住唔放，話SoCO聲稱要實踐公義但又唔遊行，激到施麗珊發嬲：「係咪唔參加遊行就唔實踐公義，唔知香港點解變到咁。你哋簡直係政治迫害、白色恐怖、迫害街坊，好失望！」其實唔單止電台節目上綱上線，社交網站亦批評SoCO因為收咗捐款而唔去遊行，其實好多組織都收捐款維持社區服務o架啦，以上種種唔係文革式批鬥又係乜呢？
反駁《蘋果》失實報道
SoCO尋日亦發表聲明反駁前日《蘋果日報》有關「社協跪低，收巨款拒遊行」嘅報道失實，強調報道提及該會收取嘅捐款係全數用於扶貧項目，重申該會繼續扎根基層，堅守人權法治，致力為基層市民和弱勢社群發聲。