中環出更：肥胡唱歌o氹「生命小戰士」
新年伊始，大家都有唔同嘅新年願望，但對於身患絕症嘅小朋友嚟講，最大願望可能係得到別人嘅關愛同照顧。醫院管理局主席胡定旭（肥胡）同新界東聯網總監馮康醫生，前日元旦參加「生命小戰士」派對，與一班癌病兒童大玩遊戲、唱歌仔及派糖果，令「小戰士」們高興萬分。
肥胡話，佢大約六、七年前第一次接觸呢個病人組織，覺得好有意義，特別是見到佢哋由癌病康復者出任義工，幫助一班自出世就要面對惡疾嘅小童及家長，深受感動，自此之後，佢必定會出席該組織嘅活動，出力之餘，更加出錢贊助活動添。
願望人人冇病痛
講到新年願望，肥胡同馮康都不約而同笑笑口話，最希望人人都冇病痛，所有醫院剩番令大家開心嘅產科就夠喇！雖然呢個願望係有啲超現實，但卓妮都同佢哋一樣，祝願大家新一年身體健康。