政商界人士平日聽聽埋埋好多料，有人「有入冇出」，亦有人則鍾意利用啲料嚟同人打牙骹博贏餐茶，講緊嘅係外號「打賭王」嘅立法會議員，佢幾乎每次打賭都準繩度極高，事後大家都不得不寫個服字畀佢。
太耐以前嘅事唔講喇，就講近期長者生活津貼撥款喺立法會財務委員會審議多時，當時泛民主派嘅「拉布戰」一直持續，當所有人都以為至少要到今個月中施政報告後先有機會表決時，「打賭王」竟然喺去年十二月七日嘅財委會，突然誇口話月內可獲通過，點知話口未完當日下午港府出招「突襲」表決，泛民又阻截唔到，長津就咁通過咗，搞到事後有部分同「打賭王」私下打牙骹嘅人都嘖嘖稱奇。
一次估到可以話係撞彩，但熟悉「打賭王」嘅人就知道，佢嘅往績並唔簡單，事實佢喺去年三月特首選舉時，都曾經同朋友開盤估兩名候選人梁振英（CY）同唐英年嘅得票，「打賭王」仲實牙實齒話CY會有七百票左右，事後CY取得六百八十九票，誤差只係得十一票，真係準到你唔信。不過，「打賭王」同人打牙骹還打牙骹，就算贏咗都冇叫輸嘅一方做番啲乜嘢，講到尾都係想威吓同攞吓彩啫！